Drangajökull
- dagskrá og sýning
kl. 15-18
Laugardaginn 10. júlí kl 15-18 verður dagskrá um Drangajökul á vegum Snjáfjallaseturs í Dalbæ á Snæfjallaströnd. Þar verður opnuð sýning þar sem gerð verður grein fyrir sérstöðu Drangajökuls og breytingum á honum í gegnum tíðina, leiðum yfir jökulinn, aðdráttum yfir hann fyrr á tímum og lífríki og jarðfræði svæðisins.
Fróðleg erindi
Helgi Björnsson jöklafræðingur á raunvísindastofnun Háskóla Íslands og Haukur Jóhannesson jarðfræðingur hjá Íslenskum orkurannsóknum verða með erindi. Oddur Sigurðsson jöklafræðingur á Veðurstofu Íslands og Eyþór Einarsson, grasafræðingur hjá Náttúrufræðistofnun Íslands, leggja auk þeirra til texta í skrá ásamt fleirum.
Hestaferðir kynntar
Ferðaþjónustan Svaðilfari í Skjaldfannardal mun kynna hestaferðir sínar í kringum Drangajökul og sýnt verður úr kvikmynd Páls Steingrímssonar Ísaldarhesturinn sem er að hluta tekin í slíkri ferð. Drangajökull er fimmti stærsti jökull landsins en hefur þó lítt verið kannaður. Hann er að ýmsu leyti frábrugðinn öðrum jöklum. Saga hans er þó allvel þekkt þar sem hann olli nokkrum búsifjum á harðindatímabilinu sem kennt er við litlu ísöld, en hann virðist ekki fara jafn halloka fyrir heimshlýnun undanfarinna ára eins og aðrir jöklar landsins. Ekkert þátttökugjald er á dagskrána og allir eru velkomnir.
Sjá nánari upplýsingar á www.snjafjallasetur.is.
Sögumiðlun tekur vistvænt skref í samgöngumálum
Myndin er fengin af heimasíðu Metan hf
Sögumiðlun ehf er staðsett í Kjósinni í friðsælu sveitaumhverfi. Innblásturinn kemur auðveldlega í slíku umhverfi en óneitanlega hefur starfsfólk Sögumiðlunar haft töluvert samviskubit yfir útblæstri í staðinn. Staðsetningin hefur því miður í för með sér meiri akstur þar sem tíðar ferðir í bæinn eru nauðsynlegar vegna ýmissa verkefna. Það hefur lengi verið draumur okkar að fá okkur vistvænt ökutæki til þess að draga úr neikvæðum umhverfisáhrifum og nú hefur sá draumur ræst. Fyrirtækið hefur fest kaup á metanbifreið af gerðinni Volkswagen.
Eins og flestir þekkja myndast metangasið í sorphaugum höfuðborgarsvæðisins í Álfsnesi en þar er það hreinsað svo hægt sé að nota það sem eldsneyti á bíla. Væri metangasið látið fara óhindrað út í andrúmsloftið myndi það valda auknum gróðurhúsaáhrifum þar sem metan er 21 áhrifaríkari gróðurhúsalofttegund en koltvíoxíð.
Að öllu jöfnu er talað um það að það þurfi 113 metanbíla til þess að hafa sömu umhverfisáhrif og 1 bensínbíll svo kostirnir eru umtalsverðir.
- Starfsfólk Sögumiðlunar ferðast nú í sátt við umhverfið.
- Það er hagkvæmara að aka á metanbíl þar sem eldsneytið er mun ódýrara en bensín og sjaldnar þarf að skipta um olíu.
- Íslenska þjóðin sparar gjaldeyri og nýtir eigin auðlindir með betri hætti þar sem metan er innlend vistvæn orka.
Á heimasíðu Metan hf, dótturfyrirtæki SORPU, er að finna ýmsar fróðlegar upplýsingar um metan. Slóðin er metan.is.
Leiklist í Hafnarfirði
Í Hafnarfirði var leikritið Ráðskona Bakkabræðra leikið fyrir fullu húsi árum saman. Leikið var í Gúttó sem var leikhús bæjarins þar til Bæjarbíó var opnað eftir stríð. Nú hefur Leikminjasafnið sett upp í Gúttó sýningu um leiklist í Hafnarfirði og enn eru þar á senunni gamlar kúlissur frá því í stríðslok. Opið er um helgar kl. 11-17.
______________________________________________________________________
María Markan
Páll Ísólfsson kallaði eitt sinn Maríu Markan „mestu söngkonu Íslands“. María var á stríðsárunum ráðin að Metropolitan óperunni í New York, en hraktist þaðan eftir að hafa verið ranglega kennd við nazisma. María var fædd í Ólafsvík og þar hefur nú verið sett upp sögusýning um hana í Félagsheimilinu Klifi á vegum Átthagastofu Snæfellsbæjar.
______________________________________________________________________
Listamaðurinn með barnshjartað
Verk Samúels Jónssonar, „listamannsins með barnshjartað“, hafa verið mörgum ferðalanginum í Selárdal innblástur. Samúel byggði einn síns liðs kirkju utan um altaristöflu sem hann málaði þegar sóknarnefndin hafði hafnað myndinni. Efni í kirkjuna bar hann á bakinu úr fjörunni fyrir neðan. Nú er í kirkju Samúels sýning um líf hans og list og endurreisn verka hans. Hannaðir hafa verið minjagripir af þessu tilefni sem eru til sölu hjá Félagi um listasafn Samúels og í Skrímslasetrinu á Bíldudal.
Hér er hægt að skoða bækling sem fylgir sýningunni.
______________________________________________________________________
Ferðafélag barnanna – spennandi verkefni
Ferðafélag Íslands hefur nýlega stofnað Ferðafélag barnanna sem er þarft og spennandi verkefni. Sögumiðlun varð þess heiðurs aðnjótandi að fá að vinna að upplýsingabæklingi um ferðalög með börnum sem nýlega kom út. Bæklingurinn ber einfaldlega heitið Ferðafélag barnanna en þar er að finna ferðaáætlun FÍ með ferðum sem sérstaklega eru ætlaðar börnum, hugmyndir að leikjum í náttúrunni og ferðum sem foreldrar og forráðamenn geta haft til hliðsjónar við skipulagningu fjölskylduferðarinnar. Einnig eru þar upplýsingar um nauðsynlegan búnað í mismunandi ferðir og margt fleira skemmtilegt. Hægt er að skoða bæklinginn á síðunni allirut.is og svo liggur hann víða frammi, t.d. á sundstöðum og fleiri opinberum stöðum. Svo má að sjálfsögðu fá hann á skrifstofu FÍ, mörkinni 6.
